Afwodizyak: se bagay gason oubyen fanm pwan pou yo anvi fè dezòd, ou byen se bagay gason-an pran ki pèmèt li gen bann pou favorize li rantre nan relasyon seksyèl. Manje ak bagay afwodizyak se manje ki gen bon piman, bon zepis, se bêt lanmè ak bagay tranpe nan alkòl. Travayè sante yo konn prèskri moun kèk renmèd afwodizyak, men renmèd sa yo pa twò efikas, anplis yo pra-l lakòz dega nan kò moun ki konsome pwodui afwodizyak sa yo twòp. Pwodui afwodizyak sa yo aji pou fè venn yo dilate, gonfle nan pati anba tivant la enpi yo ka lakòz fòs tansyon san-an nan kò-a bese. Plant afwodizyak nou ka itilize yo se : zannanna, zaboka, bannann, bwa bande, bwa flo, seleri, pèsi, zèb achapantye, lizimak, zoranj si, yèsken, pwav, tomat, vaniy.
ZANNANNA
Tranpe yon kè zannanna, pandan 8 jou nan yon lit diven blan. Sikre li ak siwo myèl pou malad la bwè yon vè ji chak jou.
ZABOKA
Graje grenn nan, mete -l tranpe pandan 8 jou nan yon lit diven blan pou moun nan bwè yon ti vè a 4 trè apremidi, oubyen yon lòt vè lè-l pra-l kouche.
BANNANN
Boukannen grenn bannann sou chabon dife mete siwo myèl sou li pou-w manje l-ap bay gason bon bann.
BWA BANDE
Mete 5 gram ekòs bwa bande-tranpe nan yon tas dlo bouyi fwèt ou byen nan yon tas wònm pandan mwatye jounen oubyen bouyi yon ponyen ekòs bwa bande nan yon lit dlo, Bouyi l pou-l redui vin yon tas pou gason an bwè tout lajounen an.
BWA FLO
Byen lave yon moso rasin bwa flo pou-w kraze-l anba dan-w enpi vale ji-a.
SELERI, PÈSI
Vide yon lit dlo ki fin bouyi sou fèy yo, kite yo tranpe 3 minit, sikre enfizyon-an koule-l. pou gason-an bwè yon vè chak katrètan.
ZÈB ACHAPANTYE
Lave yon pye zèb achapantye ak tout rasin, mete-l nan dlo ki fenk fin bouyi ou byen mete-l tranpe nan diven. Sikre enfizyon-an pou moun lan bwè yon tas lè-l pra-l kouche.
LIZIMAK
Pran yon ponyen fèy, flè frui ak bwa lizimak. Lave yo; rache yo fè ti moso; pase yo solèy pandan 3 jou. Apresa, tranpe yo nan yon lit diven blan pandan 8 jou solèy 8 nuit sèren. Gason an ap bw yo ti vè maten ak aswè nan maserayon an.
ZORANJ SI
Pire yon zoran jsi pou-w pran ji-a. mete yon vè diven blan ladann. Kite-l tranpe pandan yon mwa pou gason-an pran 3 ti vè, 3 fwa nan jounen -an.
YÈSKEN
Lave rasin ak fèy yèsken, bouyi dlo vide sou yo. Gason an ap bwè yon tas anvan-l kouche nan enfizyon-an.
PWAV
Pile 10 gram grenn pwav, mete poud la tranpe nan yon lit diven blan. Gason-an ap bwè yon ti vè glase lè l ap manje.
TOMAT
Pran ji tomat mi-an. Mete kèk gout jennsenn ladann. Bwè yon ti vè a katrè apremidi ak yon lòt ti vè lè-w pra-l kouche.
VANIY
Pile grenn vaniy lan. Mete pou chak yon kiyè poud vaniy 4 kiyè sik, pou-l bay yon sik vaniy. Ou byen mete vaniy lan tranpe nan diven dous, gason-an ap bwè 2 gwo kiyè sik vaniy 2 oubyen 3 fwa nan jounen an. Oubyen gason-an ap bwè yon ti vè nan maserasyon-an 2 oubyen 3 fwa nan jounen -an.
SEFÒM DDWP
