Anjin se maladi kote farenks lan anfle. Farenks se yonn nan pati kò a ki pèmèt moun pale ak vale nan gòj la. Lè farenks moun nan anfle yo rele maladi-a maladi farenjit. Men nan maladi anjin ki vledi yon maladi nan gòj, amigdal yo konn anfle tou. Lè sa yo di malad la soufri amigdalit kivledi enflamasyon amigdal yo. Gen plizyè kalite maladi anjin. Gen anjin blanch, ak anjin ilserez.
ANJIN SENP
Farenks moun nan wouj, li anfle, li santi doulè lè l-ap vale manje, malad la gen fyèv ki pa twò cho. Si malad la pran renmèd lè-l remake maladi-a fenk parèt, gòj la ap dezanfle apre kèk jou. Meyè fason pou moun ki soufri maladi anjin senp lan trete, se rete pou-l rete kouche. Pran medikaman pou evite konplikasyon maladi nan ren yo ak nan atikilasyon yo. Lè sa, moun ki soufri maladi anjin lan p-ap ka manje gwo manje li dwe bwè anpil ji frui, tizann. Moun ki soufri maladi anjin lan ka itilize plant medisinal sa yo pou-l konbat maladi anjin nan : patagon, dat, krètakòk boujon monben, imòtèl, powo, jenjanm navèt, paletivye, mang, pèvanch madagaska.
PATAGON
Pran fèy ak flè patagon lave yo, bouyi yo pou malad la gagarize kont maladi gòj fè mal.
DAT
Fè dite fèy ak flè dat pou malad la gagarize, l-ap jwenn gerizon.
KRÈTAKÒK
Yon dite fèy ak flè krètakòk, se yon bon jan gagarizan pou moun ki soufri anjin nan gagarize.
POWO
Fè yon dite powo pou malad ki soufri anjin nan gagarize-l, l-ap jwenn gerizon.
JENJANM
Malad la ap gagarize yon dite jenjanm pou-l jwenn soulajman.
NAVÈT
Malad la ap gagarize yon dite navèt pou-l jwenn bonjan rezilta.
PALETIVYE
Malad la ap itilize yon dite paletivye pou-l gagarize. N-ap itilize yon ponyen ekòs paletivye pou chak yon lit dlo k-ap bouyi.
MANG
Bouyi yon dlo pou nou vide sou fèy ak flè mang la, pou moun ki soufri maladi anjin nan gagarize.
PÈVANCH MADAGASKA
Fè yon dekòksyon ak 15 oubyen 20 gram pèvanch madagaska, pou malad la gagarize.
KOLAN
Fè yon dekòksyon bwa ak flè kolan yo, pou malad la gagarize jis li refè.
SEFÒM DDWP
